“Hörmətli Dostlar və Həmkarlar,

"Ümidli Gələcək" Sosial Təşəbbüslə ictimai birliyi Azərbaycanda fəaliyyət göstərdiyi 22 ildən artıq müddət ərzində təhsil, sosial və səhiyyə problemlərinin həlli, demokratiyanın inkişafı, insan və uşaq hüquqlarının müdafiəsi və təşviqində aktiv iştirak edir, uşaq və gənclərin inkişafına yönəlik innovativ yanaşmaları tətbiq edir, əhalinin daha ehtiyaclı olan təbəqələrinə öz dəstəyini əsirgəmir. 

Bütün sahələr üzrə apardığımız fəaliyyətimiz zamanı bizi istiqamətləndirən əsas strateji məqsəd – tədris, təlim, maarifləndirmə və ictimai səfərbərlik vasitəsilə mövcud problemlərin həllinə nail olmaqdır. 

Dünyanı cənginə almış pandemiya dövründə Ümidli Gələcək uşaqlara, gənclərə, əhalinin zəif təbəqələrinə göstərdiyi xidmətlərin təsirliyini və səmərəliyini artırmış, insan və uşaq hüquqlarının müdafiəsi sahəsində bu sahələrdə olan tərəfdaşları ilə daha inamlı addımlar atmışdır. 

İnanıram ki, təşkilatımızın üzvləri və əməkdaşları tərəfindən aparılan geniş miqyaslı fəaliyyət 2021-ci ildə və növbəti illər ərzində daha da səmərəli olacaq və Azərbaycanda demokratiyanın davamlı inkişafı, vətəndaş cəmiyyəti institutlarının aktivləşdirilməsi və insan və uşaq hüquqlarının müdafiəsinə öz tövhəsini verməkdə davam edəcəkdir. Dövlət başçısı, Ali Baş Komandan Cənab İlham Əliyevin rəhbərliyi altında torpaqlarımızın geri qaytarılması hər bir Azərbaycan vətəndaşı və ölkədə fəaliyyət göstərən ictimai birlik qarşısında yeni vəzifələr və məqsədlər qoyur. Azad olunmuş torpaqlarımızda firavan həyatın yenidən canlanması, regionda sülh və sabitliyin bərqərar olması məqsədilə dövlət tərəfindən atılan addımlara təşkilatımız da öz dəstəyini və töhvəsini əsirgəməyəcəkdir. 

Fəaliyyətimizi daim dəstəkləyən dövlət qurumlarına, layihə və tədbirlərimizin keçirilməsində bizə köməyini əsirgəməyən donorlarımıza və tərəfdaşlarımıza, tədbirlərimizi işıqlandıran media nümayəndələrinə təşkilat adından dərin təşəkkürümü bildirir və əməkdaşlığımızın bundan sonra da inkişaf etdirilməsini ürəkdən arzu edirəm. Əminəm ki,  pandemiyaya baxmayaraq, 2020-ci ilin dövlətimizin və millətimizin üçün uğurlu il olduğu kimi, 2021-ci il də bizim hər birimiz üçün uğurlu olacaqdır.”