İyulun 19-da Bakı Caz Mərkəzində Belçikanın Azərbaycandakı səfirliyi və “Buta” İncəsənət Mərkəzi tərəfindən,  Ümidli Gələcək Sosial Təşəbbüslər İctimai Birliyinin nəzdində təsis olunmuş Uşaq Qaynar Xətt Xidmətinin inkişafına dəstək məqsədi daşıyan, “Culture Helpline” proqramı çərçivəsində hər il təşkil edilən növbəti konsert keçirilmişdir. Bu il onlar Belçika vətəndaşı olan azərbaycanlı pianoçu və bəstəkar-müğənni Nezrineni (Nəzrin Əfəndiyeva) təqdim etməkdən qürur duymuşlar. Bakıdakı konsertdə Nezrine Fikrət Əmirov musiqisinin caz improvizasiyalarını və öz mahnılarını ifa etmişdir. Nezrinin dayısı, məşhur caz ifaçısı Cəmil Əmirov xüsusi olaraq bu tədbir üçün onun ansamblında çıxış etmişdir. Nezrine Tori Eymos, Can-Cak Qoldmandan Mayk Oldfildə kimi müxtəlif musiqi və poeziya mənbələrindən ilham alır. Konsertdən əldə edilən gəlir zorakılığın qurbanı olan və təcili qayğı və müdafiəyə ehtiyacı olan uşaqlara psoxoloji və emosional dəstək verən Ümidli Gələcək Sosial Təşəbbüslər İctimai Birliyinin Uşaq Qaynar Xətt xidmətinə hədiyyə edilmişdir.