Layihənin əsas məqsədi «Risk altında olan yetkinlik yaşına çatmayanların reabilitasiyası və cəmiyyətə tam inteqrasiyasının təşkili və onların cəmiyyətdən təcrid olunmasının qarşısının alınması məqsədilə səmərəli monitorinq və yönləndirmə mexanizmlərinin yaradılması» olub. Bu pilot layihə QHT Alyansının üzvləri olan – Ümidli Gələcək Sosial Təşəbbüslər İctimai Birliyi, Azərbaycan Gənc Hüquqşünaslar Birliyi, «El» Inkişaf Proqramları Mərkəzi tərəfindən May-Oktyabr aylarında Bakı şəhərinin 11 rayonu ərazisində həyata keçirilib. Layihə çərçivəsində Bakının bütün rayonlarının Icra Hakimiyyətləri yanında fəaliyyət göstərən «Yetkinlik yaşına çatmayanların işləri və hüquqlarının müdafiəsi üzrə komissiyalar», rayon polis şöbələrinin uşaqlarla işləyən polis müfəttişləri, məktəblərin psixoloqları və tərbiyə işləri üzrə müavinləri, uşaq problemlərilə əlaqəli işləyən QHT-lərlə sıx əməkdaşlıq qurulmuş və layihə ilə nəzərdə tutulmuş təbdirlər planı sadalanan qurumların birgə əməkdaşlığı nəticəsində həyata keçirilmişdir. Layihə müddəti ərzində qanunla ziddiyətə düşməyə risk altında olan uşaqların vaxtında müəyyənləşdirilməsi, onlar arasında psixo-sosial reabilitasiya işinin aparılması vasitəsilə məktəbə, ailəyə və cəmiyyətə tam inteqrasiyasını əks etdirən mexanizm hazırlanmış və təcrübədən keçirilmişdir.