Müasir Təhsil və Tədrisə Yardım Mərkəzinin təşkilatçılığı ilə “Təhsildə şəffaflıq, etika və antikorrupsiya tədbirləri” mövzusunda 3 günlük seminar dünən öz işinə başlayıb (APA). YUNESKO-nun nümayəndəsi Yak Hallak bildirib ki, dünyanın 30 trilyon dollarlıq iqtisadiyyatının 1 trilyonu korrupsiyanın payına düşür. Azərbaycanda təhsilin vəziyyəti barədə bəzi fikirlərini açıqlayan ekspert deyir ki, 1999-cu ildə məktəb yaşına çatan uşaqların 100%-i məktəbə gedirdisə, 2002-ci ildə bu rəqəm 79,9% olub: “Özəl təhsil üzrə göstərici də çox aşağıdır - 0,3%. Güman etmək olar ki, bu göstərici çox sürətlə artacaq. Təhsilə sərf olunan dövlət vəsaiti də aşağıdır. 1990-cı ildə ümumi daxili məhsulun 7,7, 2002-ci ildə 3,2%-i təhsilə sərf olunub. Məncə, Azərbaycan öz vəziyyətini Amerika və Avropa dövlətləri ilə müqayisə etməlidir”.